Të distancuar nga Kuvendi për rreth 3 muaj për shkak të kaosit, PD e Lulzim Bashës ka depozuar disa projekt-ligje, të cilat kërkojnë votat e kolegëve opozitarë dhe PS-së. Projektligjet kanë të bëjnë me dorëzimin vullnetarisht të imunitetit, ashpërsimit të dënimit për shpifje të deputetëve apo ndryshime në kodin zgjedhor
Është projektligji i fundit, mes disa nismave ligjore të depozituara nga Lulzim Basha në Kuvend, kur kolegët e tij opozitarë vijonin aksionin bllokues të punimeve parlamentare: ndryshimi në rregulloren e Kuvendit, që lidhet me dorëzimin vullnetar të imunitetit.
Ky projekt-ligj, që kërkon shumicë të thjeshtë votash, erdhi në një kohë kur Kuvendi diskutonte imunitetin e Sali Berishës dhe kërkon që deputetët të nënshkruajnë në fillim të legjislaturës së re, një deklaratë, përmes së cilës heqin dorë vullnetarisht nga imuniteti, në çdo rast që SPAK i dërgon një kërkesë Kuvendit.
Një tjetër projekt-ligj i depozituar nga Lulzim Basha është ai për ndryshimin e kodit penal, që kërkon 84 vota. Pas përplasjes me Gazment Bardhin për kullat në seancën e 5 tetorit, 2 muaj më pas Basha kërkoi ashpërsim të kodit penal për shpifjen, duke kërkuar 2 vite burg, kur shpifja bëhet nga foltorja e Kuvendit.