Këto lojëra, aventura zbavitëse në dukje, janë më tepër se aq
Big Brother VIP 3 nisi aty ku u la sezonin e kaluar, me rrugët e boshatisura ditët e prime-ve dhe audiencën maksimale të mbërthyer pas ekranit të Top Channel. Ky fillim i vrullshëm pa debatet e para vetëm pak orë pas prezantimit të konkurrentëve me njëri-tjetrin. Protagonistët e parë ishin Juli dhe Egla që treguan menjëherë që bashkëjetesa në komunitet nuk do të ishte aspak e lehtë për ta.
Karakteret alfa të disa prej personazheve kanë bërë që grricjet dhe përplasjet, madje edhe për gjënë më të vogël, të jenë të shumta, duke e bërë lojën në vetëm pak kohë shumë intriguese, të fortë dhe interesante.
Ajo që gjithashtu ka rënë në sy ka qenë fakti se si i kanë përballuar sfidat dhe lojërat e Vëllait të Madh banorët e shtëpisë më të famshme në Shqipëri.
Këto lojëra, aventura zbavitëse në dukje, janë më tepër se aq. Ato ofrojnë një mundësi të pasur për studimin e sjelljes njerëzore, dinamikën sociale dhe efektet psikologjike të bashkëpunimit në rastet e një grupimi, madje edhe kur anëtarët e grupit i ke zgjedhur po vetë.
Kujtojmë rastin më të fundit brenda në shtëpi, kur Vëllai i Madh u ka dhënë konkurrentëve sfidën e rezistencës me duar të lidhura. Tre më të preferuarit e shtëpisë, Romeo, Juli dhe Ilnisa zgjodhën secili nga 7 anëtarë. Këto zgjedhje shpesh bëhen në varësi të marrëdhënies personale që ke me banorin që zgjedh.
Por as kjo, me sa duket, nuk mjafton për një mbarëvajtje perfekte të sfidës. Ashtu si me çdo grup njerëzish në një hapësirë të mbyllur, konflikti ndër-grupor ka të ngjarë të ndodhë. Është interesante se si mjafton pak kohë, një shkëndijë mes banorëve apo një nxehje e momentit që të shkatërrojë komplet misionin.
Në rastin konkret, grupi i Ilnisës ishte i pari që u dorëzua duke hequr dorë nga imuniteti i nominimit për shkak të një konflikti të brendshëm me tone të ashpra që nisi mes Merit dhe Sarës, gati deri në konfrontim fizik dhe jo vetëm. Pas përfundimit, Graciano (pjesëtar i grupit gjithashtu) akuzonte drejtpërdrejt lideren e grupit Ilnisën, se nuk e kishte menaxhuar si duhet situatën dhe se kishte shkaktuar përçarje në grup. Nga ana tjetër Ervini u shfaq i nxehur në disa raste për situata që sipas tij ishin të pakuptimta dhe egoiste, kur Meritoni vinte në vështirësi pjesëtarët e tjerë vetëm për të përqafuar e puthur Ilnisën.
Nga ana tjetër, dy grupet e tjera, ai i Romeos dhe Julit vazhdojnë lojën të padorëzuar edhe pse nuk munguan disa konflikte mes tyre. Një koment i Gazit për grupin e Romeos që “është grup më i mirë” nervozoi Julin që në një farë mënyre „kërcënoi“ Gazin se do ja „priste litarin nga dora në moment“.
Tiparet që këto lojëra nxjerrin në pah për secilin banor variojnë nga: fryma e bashkëpunimit, puna në grup, lidershipi brenda vetes, menaxhimi i situatave në kohë të vështira, mos dorëzimi apo dhe sakrifikimi për qëllimin e përbashkët.
Po ashtu zgjedhja e liderit në shtëpi ka agravuar situatën të shoqëruar me debate vetëm e vetëm prej një roli që merr një nga banorët dhe se si e shfrytëzon atë.
Një lidere e „rreptë“ si Ilnisa që e mori seriozisht rolin dhe ktheu shumicën e shtëpisë kundër vetes me sjelljen e saj apo një lidere tolerante si Egla, që edhe për të cilën pati ankesa për mos ndarjen e bërjen e detyrave siç duhet.
Kjo situatë na kujton një nga filmat më të njohur „The Experiment” me regji të Paul T. Scheuring dhe një kast aktorësh si Adrien Brody, Forest Ëhitetaker dhe Cam Gigandet.
Eksperimenti tregon se sa lehtë njerëzit do t’i përshtaten dhe do t’i binden një ideologjie bindëse dhe presionit të grupit. 26 persona regjistrohen në një eksperiment psikologjik ku ata marrin rolet e të burgosurve dhe gardianëve në një burg bosh. Edhe pse në fillim të gjithë shkonin mirë, nuk vonoi që situata të dilte jashtë kontrollit për shkak të roleve që iu dhanë pjesëmarrësve.
Një tjetër lojë që solli mllefe e konflikte ishte dhe ajo e vendosjes së epiteteve të banorëve për njëri-tjetrin. Hipokrit, cinik, i pamoralshëm, seksi, lider, delirant, mashtrues ishin epitetet që çakorduan menjëherë banorët. Edhe pse si për të hequr barrën e fajit që pse njërin epitet po ia vënë njërit, e epitetin tjetër tjetrit, disa thanë që „nuk më mbetet qefi nëse ma vendos mua atë fjalë“, debatet dhe mëritë nuk munguan. Epiteti i „pamoralshëm“ u bë shkak që Roza dhe Erjola të ndihen „armike“ brenda në lojë, apo dhe konkurrenti tjetër Graciano që për t`i shpëtuar paq lojës dhe përgjegjësisë së vendosjes së epiteteve, vendosi ta bënte në mënyre rastësore zgjedhjen.