Në duart e shqiptarit ka prerje, që dëshmojnë se ka tentuar të mbrohet nga sulmi me thikë
Mediat italiane kanë zbardhur detaje të reja nga vrasja e shqiptarit 39-vjeçar, Bledar Dedja, prind i dy fëmijëve, i cili jetonte prej vitesh përtej Adriatikut.
39-vjeçari që jetonte në Asolo, u gjet i masakruar me thikë mëngjesin e së dielës në pyjet e Paderno del Grappa.
Hetuesit dyshojnë se bëhet fjalë për një takim fatal, që përfundoi keq. Ai me gjasë tentoi t’i ikte vrasësit, duke u larguar gati 100 metra nga makina, që u gjet në vendin ku ndodhi krimi. Por sipas dyshimeve të para, vrasja e 39-vjeçarit nuk ka ndodhur për shkak të një tentative për ta grabitur, pasi portofoli dhe të gjitha sendet personale nuk janë prekur nga vrasësi.
Karabinierët kanë marrë po ashtu në pyetje familjarët dhe miqtë e 39-vjeçarit, teksa kanë zbuluar se viktima i kishte thënë bahskëhsortes se pas pune do takonte disa persona, por pa treguar konkretisht se kë. Kryesore për hetuesit është të zbulojnë se kë do të takonte pasditen e së shtunës.
Shqiptari kishte marrë shumë plagë me thikë, teksa fatale ishte një që e kishte prekur në mushkëri. Nga ana tjetër, të shumta janë plagët që ai ka marrë në duar dhe që dëshmojnë tentativën e tij për t’u mbrojtur.
Zona ku ndodhi vrasja nuk është e mbuluar me kamera sigurie publike dhe e vetmja shpresë është që makina “Mercedes” e viktimës të jetë kapur në një prej kamerave private të instaluara nga shtëpitë private në zonë.