Polici që dyshohet se shkaktoi aksidentin në Selitë, duke përplasur makinën me të cilën po eskortohej djali i gjyqtares Irena Gjoba, është gjobitur.
Policia rrugore i ka sekuestruar edhe mjetin privat tip “Benz” me targa zviceriane, me të cilin goditi makinën eskortë të familjes së gjyqtares së Gjykatës së Posaçme Antikorrupsion, që po ruhet në masa të shtuara sigurie, pas vendimit që dha pak javë më parë për ish-kryeministrin Sali Berisha.
Ardjan Disha është efektiv i Policisë Rrugore në Elbasan. Një natë më parë, ai u përplas me makinën që drejtohej nga Izidor Heta dhe që po eskortonte nga Rinasi djalin e Gjokës.
Sipas dëshmisë së gardistëve, polici udhëtoi pas tyre që nga Rinasi e deri në Selitë, aty ku shkaktoi përplasjen. E paralajmëruam tre herë që të mos hynte në eskortë, thonë gardistët, por efektivi nuk na u bind.
Vetë Disha pretendoi se ishte lagështira në rrugë që e bëri të humbasë kontrollin dhe të rrëshqasë. Ndërkohë vazhdon hetimi dhe janë kërkuar të merren kamerat për të parë çfarë rregullash ka shkelur polici.
Top Channel