Fama e Big Brother është aq e madhe, saqë publiku ka filluar t’i imitojë personazhet e dashura, si vishen, si sillen, çfarë hanë.
Batutat që prodhohen brenda shtëpisë, i kanë bërë pjesë të përditshmërisë. Psikologja Bruna Laboviti tregon se përse shikuesit imitojnë më të pëlqyerit e shtëpisë
“Imitimi ndodh për faktin që shumica e ka aprovuar si fenomen, që do të thotë që e ka pëlqyer këtë Reality Show. Dhe duke qenë se e ke pëlqyer, ti ke tendencën që t’i qëndrosh më shumë pranë këtij personazhi. Dhe realisht shumica pëlqejnë një masë të madhe të veprimeve të personazhit të dashur, edhe nëse ai nuk ha me pirun, prapë pëlqehet, sepse ne, shumica e njerëzve nuk është se e përdorim pirunin dhe thikën vazhdimisht në përditshmëri. Shihen elemente që shumica e njerëzve i kanë dhe i bëjnë, por ndonjëherë kanë komplekse t’i prezantojnë në publik. Personazhet aty nuk i kanë këto lloj kompleksesh, pasi e dinë shumë mirë që vëzhgohen 24 orë nga kamerat, por njerëzit jashtë mendojnë, sa mirë edhe ai e bënka këtë, dhe ndonjëherë e gjitha kjo mund të zhbëjë edhe komplekse te shumë persona. Publiku i studion me hollësi personazhet e dashura.
Shpesh dëgjoj njerëz që thonë, unë jam fiks si ai. Për shoqërinë shqiptare është personazh I dashur ai që ha pa komplekse, bisedon pa komplekse, bën shaka, ka humor, është serioz, inteligjent. Shkrimtari Mark Twain thotë se të flasësh për motin, nuk të lë asnjëherë në baltë. Ndërsa tani thuhet që të flasësh për Luizin, nuk të lë në baltë. Shumë meshkuj kanë ndryshuar ngjyrën e flokëve, si personazhi i tyre i dashur, vishen, grimohen, konsumojnë njësoj si të preferuarit e tyre. Big Brother ka marrë një përmasë më të madhe dhe më të pabesueshme ndoshta edhe për ata vetë, të cilët e kërkojnë suksesin brenda atij programi, por nuk i parashikojnë përmasat e famës”- shprehet psikologia. /Top Channel/