Shqiptari u qëllua me 3 plumba në shtëpinë e tij
Një shqiptar është plagosur me armë zjarri në Greqi, pasi ishte shënjestra e një atentati. Mësohet se ngjarja ka ndodhur mbrëmjen e djeshme rreth orës 23:30, në zonën Ahaja, në Peloponez, teksa i plagosur ka mbetur 39-vjeçari Emil Fatmir Backa.
Sipas policisë lokale, një person që ndodhej në një automjet të markës “Citroen” me xhama të zinj, iu afrua banesës së shqiptarit dhe qëlloi të paktën 3 herë. Prej plumbave Backa mori plagë të rënda, por mjekët thonë se për momentin ai ndodhet jashtë rrezikut për jetën.
Në trupin e viktimës ka mbetur ende një plumb, ndërsa ai është dërguar në spitalin universitar të Patrës, ku mbahet në reanimacion në pritje të një ndërhyrje kirurgjikale për heqjen e plumbit. Policia thotë se autori i dyshuar mundi të largohet me shpejtësi nga zona, ndërkohë që po zhvillohen hetime për gjetjen e tij.
Mësohet se paraprakisht, pista kryesore e hetimeve është ajo e luftës mes bandave të drogës, pasi viktima ka precedent penal për trafik droge. Ai është liruar nga burgu famëkeq i Korridhalosit, ku mbahej për trafik narkotikësh, në mars të 2023 dhe dyshohet se ende vazhdon trafikun e narkotikëve në zonë.