Prindërit e një 3 vjeçari kanë denoncuar në komisariatin nr 4 një klinikë dentare ku fëmija i tyre humbi jetën pasi dyshojnë se iu injektua narkozë me dozë më të lartë sesa mund ta përballonte.
Ngjarja ka ndodhur 3 ditë më parë, ndërsa dentisti është identifikuar si Roland Xhaxho.
Klinika dentare ndodhet në zonën e Rrugës së Kavajës. Ndërkaq policia jep detaje nga hetimi paraprak i ngjarjes.
Njoftimi i policisë:
“Specialistët për Hetimin e Krimeve të Komisariatit të Policisë Nr. 4 kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për shtetasin R. Xh., 70 vjeç, banues në Tiranë, për veprën penale “Mjekimi i pakujdesshëm”, pasi ka bërë kallëzim shtetasi B. S. se shtetasi R. Xh. ka mjekuar në mënyrë të pakujdesshme në klinikën e tij private, djalin 3-vjeçar të shtetasit B. S., i cili pas mjekimit në këtë klinikë ka shfaqur komplikacione dhe pas 3 ditësh, ka humbur jetën, në spital”.